EPFOનો નવો નિયમ: હવે PFમાંથી ₹7.5 લાખ સુધીનો આંશિક ઉપાડ સરળ બન્યો
પગારદાર કર્મચારીઓ માટે કેન્દ્ર સરકારે કર્મચારી ભવિષ્ય નિધિ (EPF) સંબંધિત નિયમોમાં મહત્વપૂર્ણ ફેરફાર કર્યા છે. 29 જૂન, 2026થી અમલમાં આવેલા નવા નિયમો મુજબ હવે EPFO સભ્યોને કટોકટી અથવા અન્ય જરૂરી પરિસ્થિતિમાં પોતાના PF ખાતામાંથી આંશિક રકમ ઉપાડવાની પ્રક્રિયા વધુ સરળ બનશે.
નવા નિયમ મુજબ, PF ખાતામાં રહેલી સંપૂર્ણ રકમ ઉપાડી શકાશે નહીં. EPFOએ સ્પષ્ટ કર્યું છે કે પાત્ર બેલેન્સના ઓછામાં ઓછા 25 ટકા ખાતામાં જાળવી રાખવા ફરજિયાત રહેશે. એટલે કે જો કોઈ સભ્યના PF ખાતામાં ₹10 લાખ જમા હોય, તો તેમાંના ₹2.5 લાખ ખાતામાં રાખવાના રહેશે અને બાકીના ₹7.5 લાખ સુધીનો આંશિક ઉપાડ કરી શકાશે.
આ નવી વ્યવસ્થા હેઠળ ઓછામાં ઓછા 12 મહિનાની સેવા પૂર્ણ કરનાર કર્મચારીઓ આ સુવિધાનો લાભ લઈ શકશે. ઉપરાંત, ઘર ખરીદવા, પ્લોટ લેવા, હોમ લોનની ચુકવણી, ઘરનું સમારકામ, તબીબી સારવાર, ઉચ્ચ શિક્ષણ અને લગ્ન જેવા મહત્વના ખર્ચ માટે નિયમો મુજબ PFમાંથી રકમ ઉપાડી શકાશે.
EPFOએ ડિજિટલ પ્રક્રિયાને વધુ ઝડપી બનાવવા માટે નવી વ્યવસ્થા પણ શરૂ કરી છે. PF ક્લેમ મંજૂર થયા બાદ રકમ સીધી UPI મારફતે બેંક ખાતામાં જમા કરવાની સુવિધાનું સફળ પરીક્ષણ કરવામાં આવ્યું છે, જેથી સભ્યોને વધુ ઝડપથી નાણાં મળી શકે.