તહેવાર ટાણે ફ્લાઇટના ભાડા વધતા સુપ્રીમ કોર્ટે નોંધ લીધી, આપી દીધું અલ્ટિમેટમ

મોંઘી ફ્લાઇટ ટિકિટ સામે સુપ્રીમ કોર્ટ સખ્ત

તહેવારો અને રજાઓ દરમિયાન હવાઈ મુસાફરી માટે મુસાફરોને ચૂકવવા પડતા ભારે ભાડા અંગે સુપ્રીમ કોર્ટે કડક વલણ અપનાવ્યું છે. કોર્ટે કેન્દ્ર સરકારને હવાઈ ભાડાને નિયમિત કરવા માટે તૈયાર કરાયેલા નિયમોની નકલ બે અઠવાડિયામાં રજૂ કરવાનો નિર્દેશ આપ્યો છે. આ કેસની આગામી સુનાવણી 3 ઓગસ્ટે થશે.

કેન્દ્રે શું કહ્યું?

કેન્દ્ર સરકારે સુપ્રીમ કોર્ટમાં જણાવ્યું કે હવાઈ ભાડાને નિયમિત કરવા માટેના નિયમો તૈયાર થઈ ચૂક્યા છે અને આગામી 30 દિવસમાં સંસદના બંને ગૃહોમાં રજૂ કરવામાં આવશે. ત્યારબાદ જસ્ટિસ વિક્રમ નાથ અને સંદીપ મહેતાની બેન્ચે નિયમોની નકલ બે અઠવાડિયામાં કોર્ટ સમક્ષ રજૂ કરવા કહ્યું.

ડાયનેમિક પ્રાઈસિંગ પર ઉઠ્યા સવાલ

અરજીમાં દલીલ કરવામાં આવી છે કે ખાનગી એરલાઈન્સ એલ્ગોરિધમ આધારિત ડાયનેમિક પ્રાઈસિંગ દ્વારા તહેવારો અને પીક સીઝનમાં મનફાવે તેમ ભાડું વસૂલે છે. ઉપરાંત સીટ પસંદગી, વધારાના સામાન અને પ્રાથમિકતા જેવી સેવાઓ માટે વસૂલાતા વધારાના ચાર્જમાં પણ પારદર્શિતા ન હોવાનો મુદ્દો ઉઠાવવામાં આવ્યો છે.

અરજીમાં શું માંગ કરવામાં આવી?

અરજદારે હવાઈ ભાડામાં અચાનક અને અતિશય વધારાને રોકવા માટે સ્પષ્ટ નિયમો બનાવવાની, મુસાફરોની ફરિયાદો માટે અસરકારક વ્યવસ્થા ઉભી કરવાની અને સ્વતંત્ર એવિએશન ટેરિફ તથા ગ્રાહક સુરક્ષા સંસ્થાની રચના કરવાની માંગ કરી છે. ઉપરાંત ઇકોનોમી ક્લાસના મુસાફરો માટે ઓછામાં ઓછું 25 કિલો મફત ચેક-ઇન બેગેજ ફરીથી લાગુ કરવાની પણ માંગ કરવામાં આવી છે.

ડાયનેમિક પ્રાઈસિંગ એટલે શું?

ડાયનેમિક પ્રાઈસિંગ એવી પદ્ધતિ છે જેમાં માંગ, સીટોની ઉપલબ્ધતા, બુકિંગનો સમય અને તહેવારો જેવા પરિબળોના આધારે ફ્લાઇટ ટિકિટના ભાવ સતત બદલાતા રહે છે. માંગ વધે ત્યારે ભાવમાં મોટો ઉછાળો આવે છે, જેના કારણે મુસાફરોને ઘણી વખત સામાન્ય દિવસોની સરખામણીએ અનેકગણું વધુ ભાડું ચૂકવવું પડે છે.