વાંગચુક મુદ્દે રાહુલ ગાંધીનો સરકાર પર આકરો હુમલો
અનિશ્ચિત મુદ્દતની ભૂખ હડતાળ પર રહેલા સામાજિક કાર્યકર સોનમ વાંગચુકને દિલ્હી પોલીસે જંતર-મંતર પરથી હટાવીને સફદરજંગ હોસ્પિટલમાં દાખલ કર્યા બાદ રાજકીય માહોલ ગરમાયો છે. હવે કોંગ્રેસના નેતા અને લોકસભામાં વિપક્ષના નેતા રાહુલ ગાંધીએ સોશિયલ મીડિયા પ્લેટફોર્મ X પર પોસ્ટ કરીને કેન્દ્ર સરકાર પર આકરા પ્રહારો કર્યા છે.
'વિદ્યાર્થીઓને કોઈ તાકાત રોકી નહીં શકે'
રાહુલ ગાંધીએ પોતાની પોસ્ટમાં લખ્યું કે મોદી સરકારનો આધાર અસત્ય અને હિંસા પર છે અને અહિંસક ભૂખ હડતાળ પર બેઠેલા સોનમ વાંગચુકને જંતર-મંતર પરથી હટાવવાનો નિર્ણય ખોટો છે. તેમણે વધુમાં કહ્યું કે પેપર લીક, શિક્ષણનો વધતો ખર્ચ અને વિદ્યાર્થીઓની આત્મહત્યાઓ જેવા મુદ્દા દેશના ભવિષ્ય સાથે જોડાયેલા ગંભીર પ્રશ્નો છે. સાથે જ તેમણે દાવો કર્યો કે "દુનિયાની કોઈ તાકાત ભારતના વિદ્યાર્થીઓને અને તેમના હિત માટે અવાજ ઉઠાવનારાઓને રોકી શકશે નહીં."
પોલીસે કેમ હોસ્પિટલ ખસેડ્યા?
દિલ્હી પોલીસના જણાવ્યા અનુસાર, સોનમ વાંગચુકના ઉપવાસનો 21મો દિવસ હોવાથી તેમની તબિયત બગડી ગઈ હતી. મેડિકલ નિષ્ણાતોની સલાહ અને દિલ્હી હાઈકોર્ટના નિર્દેશોના આધારે તેમને સફદરજંગ હોસ્પિટલમાં દાખલ કરવામાં આવ્યા છે. લાંબા સમય સુધી ભૂખ હડતાળ અને ડિહાઈડ્રેશનને કારણે તેમની તબિયત નાજુક બનતાં આ પગલું ભરવામાં આવ્યું હોવાનું પોલીસે જણાવ્યું છે.
હોસ્પિટલ બહાર કડક સુરક્ષા વ્યવસ્થા
સોનમ વાંગચુક હોસ્પિટલમાં દાખલ થયા બાદ સફદરજંગ હોસ્પિટલ અને આસપાસના વિસ્તારમાં સુરક્ષા વધારી દેવામાં આવી છે. દિલ્હી પોલીસ ઉપરાંત અર્ધલશ્કરી દળોને પણ તૈનાત કરવામાં આવ્યા છે. કાયદો અને વ્યવસ્થા જળવાઈ રહે તે માટે અનેક સ્થળોએ બેરિકેડિંગ કરવામાં આવ્યું છે.