પ્રીમિયમ પેટ્રોલને લઈને ચાલતી ચર્ચા પર આવ્યો સ્પષ્ટ જવાબ
દેશમાં E20 પેટ્રોલનો અમલ વધ્યા બાદ વાહનચાલકોમાં એક સામાન્ય પ્રશ્ન ઉભો થયો છે કે શું મોંઘા પ્રીમિયમ પેટ્રોલમાં ઇથેનોલ ઓછું અથવા બિલકુલ ન હોય છે? ખાસ કરીને જૂના મોડલની કાર અને બાઈક ધરાવતા લોકોમાં એવી માન્યતા જોવા મળે છે કે પ્રીમિયમ ફ્યુઅલ એન્જિન માટે વધુ સુરક્ષિત છે. જોકે, વિવિધ ઓઇલ કંપનીઓની સત્તાવાર માહિતી આ માન્યતા સંપૂર્ણ રીતે સાચી નથી હોવાનું દર્શાવે છે.
ઇન્ડિયન ઓઇલ અને HPCLએ જાહેર કરી મહત્વની માહિતી
Indian Oilના જણાવ્યા મુજબ XP100 અને XP95 જેવા પ્રીમિયમ પેટ્રોલમાં પણ ઇથેનોલનું મિશ્રણ કરવામાં આવે છે. જોકે અલગ-અલગ સ્ત્રોતોમાં તેની ટકાવારી અંગે જુદા દાવા પણ સામે આવ્યા છે. બીજી તરફ HPCLએ સ્પષ્ટ કર્યું છે કે તેના Power95, Power99 અને Power100 જેવા પ્રીમિયમ ગ્રેડમાં પણ ઇથેનોલ હાજર રહે છે, પરંતુ સામાન્ય પેટ્રોલની સરખામણીએ તેનું પ્રમાણ ઓછું હોઈ શકે છે.
BPCL, Shell અને Jio-bpનું શું કહેવું છે?
BPCLના Speed અને Speed100 સહિત વિવિધ વેરિઅન્ટમાં પણ નિયમો અનુસાર ઇથેનોલનું મિશ્રણ કરવામાં આવે છે. Shell Indiaએ જણાવ્યું છે કે તેના સામાન્ય પેટ્રોલ અને V-Power બંનેમાં ઇથેનોલનું પ્રમાણ લગભગ સમાન રહે છે, પરંતુ પ્રીમિયમ ફ્યુઅલમાં એન્જિનને સ્વચ્છ રાખવા માટે ખાસ એડિટિવ્સ ઉમેરવામાં આવે છે. જ્યારે Jio-bp દેશભરમાં નિયમ મુજબ E20 પેટ્રોલ જ ઉપલબ્ધ કરાવે છે.
મોંઘું પેટ્રોલ એટલે ઇથેનોલથી મુક્તિ નહીં
નિષ્ણાતોના મત મુજબ પ્રીમિયમ પેટ્રોલનો મુખ્ય હેતુ ઇથેનોલ ઘટાડવાનો નહીં પરંતુ એન્જિનની કામગીરી સુધારવાનો અને કાર્બન ડિપોઝિટ ઓછો કરવાનો હોય છે. એટલે માત્ર વધુ કિંમત ચૂકવવાથી ઇથેનોલ સંપૂર્ણપણે ટળી જાય એવું માનવું યોગ્ય નથી. વાહન માટે કયું પેટ્રોલ યોગ્ય છે તે અંગે હંમેશા ઉત્પાદક કંપનીની ભલામણને પ્રાથમિકતા આપવી જોઈએ.