માંજલપુરમાં ચૂંટણીનો જંગ શરૂ
વડોદરાની માંજલપુર વિધાનસભા બેઠકની પેટાચૂંટણી હવે વધુ રસપ્રદ બની છે. ભાજપ બાદ કોંગ્રેસે પણ પોતાના ઉમેદવારની જાહેરાત કરીને ચૂંટણીનો શંખનાદ કરી દીધો છે. કોંગ્રેસે ગુજરાત કોંગ્રેસના ઉપપ્રમુખ ભીખાભાઈ રબારીને સત્તાવાર ઉમેદવાર જાહેર કર્યા છે, જ્યારે ભાજપે સતીષ પટેલ પર વિશ્વાસ વ્યક્ત કર્યો છે.
કોણ છે ભીખાભાઈ રબારી?
ભીખાભાઈ રબારી કોંગ્રેસના વરિષ્ઠ અને અનુભવી નેતા છે. તેઓ રાજ્ય સરકારમાં મંત્રી તરીકે સેવા આપી ચૂક્યા છે. ઉપરાંત વિધાનસભા, જિલ્લા અને તાલુકા પંચાયતની અનેક ચૂંટણીઓમાં ચૂંટણી પ્રભારી તરીકે મહત્વપૂર્ણ જવાબદારીઓ નિભાવી ચૂક્યા હોવાથી સંગઠનમાં તેમની મજબૂત પકડ માનવામાં આવે છે.
યોગેશ પટેલના નિધન બાદ બેઠક ખાલી
માંજલપુર બેઠક ભાજપના વરિષ્ઠ ધારાસભ્ય યોગેશ પટેલના નિધન બાદ ખાલી પડી હતી. હવે આ બેઠક પર યોજાનારી પેટાચૂંટણીમાં ભાજપ અને કોંગ્રેસ વચ્ચે સીધી ટક્કર જોવા મળશે. બંને પક્ષોએ ઉમેદવારો જાહેર કરી દીધા હોવાથી ચૂંટણી પ્રચાર હવે વધુ તેજ બનશે.
ભાજપના ઉમેદવાર સતીષ પટેલ
ભાજપે આ બેઠક પરથી સતીષ પટેલને ઉમેદવાર બનાવ્યા છે. તેઓ વર્ષોથી વડોદરા ભાજપ સંગઠનમાં સક્રિય રહ્યા છે અને સ્થાનિક સ્તરે મજબૂત સંગઠનાત્મક પકડ ધરાવે છે. આવતીકાલે તેઓ વિજય વિશ્વાસ રેલી સાથે ઉમેદવારી નોંધાવશે. ત્યારબાદ ભાજપના ચૂંટણી કાર્યાલયનું ઉદ્ઘાટન પણ કરવામાં આવશે.
ચૂંટણી કાર્યક્રમ જાહેર
ભારતના ચૂંટણી પંચે જાહેર કરેલા કાર્યક્રમ મુજબ 13 જુલાઈ ઉમેદવારી નોંધાવવાની છેલ્લી તારીખ છે. 14 જુલાઈએ ઉમેદવારીપત્રોની ચકાસણી થશે, 16 જુલાઈએ ઉમેદવારી પરત ખેંચવાની અંતિમ તારીખ રહેશે. 30 જુલાઈએ મતદાન અને 3 ઓગસ્ટે મતગણતરી યોજાશે.